اوعاك تخاف/ اسماعيل الطواب
أوعاك تخاف
🦋🦋🦋🦋
أوعاك تبوس أيد الزمن
وتسأله .. عن لقمتك
وتوب الذل لا تلبسه
ولا تدفن جواه عفتك
العمر سكة قصيرة
والدنيا دايرة وعمرها
ما تترسم بالمسطرة
✨✨✨
أوعاك تخاف
وأمشي وخلي خطوتك
في سكتك
تسيب أثر
وأحفر يعزم همتك
حكمة على جبين القدر
إن البشر كل البشر
واحد مفيش اي اختلاف
بداية .. .. نابتة من وهن
ونهاية محصودة في كفن
والعمر سكة صغيرة
ازاي تحس باختلاف
✨✨✨
اوعاك تخاف
وأبدر بأيدك
بذور خضار
تطرح في سنينك العجاف
وأركب حصان الحلم
من فوق السحاب
واحضن شعاع الشمس
وحس بالدفا
متسيبش ولا لحظة فرح
في قلبك تبات متكتفة
وأفرد قلوعك في الحياة
وأكسر سكوتك
وأصرخ بصوتك
وسمع الدنيا صداه
لو حتى رافضة الاعتراف
وأوعاك تخاف
✨✨✨✨✨
بقلمي
إسماعيل الطواب
تعليقات
إرسال تعليق