هسألك /بقلم محمد عبد العزيز رمضان
هسألك
كلمات الشاعر محمد عبد العزيز رمضان
هسألك ويا ريت تقولى
اللى بينا كان كلام
كان رواية قصة حلوة
وانتهت من غير سلام
حاسس إنك حلم عدى
طيف ظهرلى فى المنام
أو سحابة فوقى عدت
أو شعاع بين الضلام
أو حكاية بدون نهاية
ليه توقعنى فى غرام
ليه تقولى كمان بحبك
ليه بترمينى بسهام
كل حاجه بينا كدبة
مش هيكفيها الملام
هسألك ويا ريت تقولى
اللى بينا ليه يهون
ليه نسيت كل اللي بينا
نظرة حلوة من العيون
ضحكتك نستنى همى
قلتلى مش راح أخون
أنت عمرى جوا قلبى
ليه تفرقنا الظنون
ليه تبعنى وانت عارف
إنى من غيرك هكون
قصر عالى بس خالى
عشت فيه هم وشجون
بحر موجه صعب عالى
كنت فاكره كمان حنون
كنت فاكره حضن دافى
ضى عينى والجفون
سبنى تايه فى الليالى
راح رمانى فى الجنون
تعليقات
إرسال تعليق