مولات الحنة /ادريس بندار

 زجلية : مولات الحنة ...                                                               ==============

                                                                                 01

كِيفْ نَبْدَا وَأَنْتِ

مَنْ بَكْرِي كُنْتِ

وَحْنَا مَا كُنَّا 

في كُلْ سُوقْ 

فْكُلْ رَحْبَة 

نْشَمْ رِيحَةْ الْجَنَّة

مْنِينْ ذِيكْ الرِّيحَة

مَنْ مُولاَتْ الْحَنَّة

وْصَلْتْ ﮔدَّامْ وْجَهْ

عْطِيَّة مَنْ مُولْ الْمَنَّة

الْعَاشَقْ مَنْ عْيُونْهَا

يَتْرَجَّا وَيَتْمَنَّى 

مَرْوَدْ بَالْكْحُلْ

دَايَرْ خَبْلَة

وَالسْوَاكْ عَالَقْ فَالسَّنَّة

وَالشْمَارْ كِيفْ الْعَسَّاسْ

وَاقَفْ  يَتْسَنَّى

وَالْوْشَامْ مَنْ ذِيكْ لَجْبَالْ

جَايْ يَتْغَنَّى

وَحْزَامْ بَهْذَبْ رِيشْ

 بْحَالُو مَا شَنَّا 

وَحَنَّة مَنْقُوشَة فْرَجْلِينْ

مَا ٽڱولْ مُولاَتْ الْحَنَّة                                                                      02              

فِي وَسْطْ السُّوقْ 

ﮔَلْسَتْ لاَلَّة ﮔلْسَة  

بْهَمَّة وْشَانْ

بْمِيزَانْ يَتْوَسَّطْ 

عْطُورْ مْسَتْفِينْ كِيسَانْ

شْوِيَّة شْوِيَّة مَنْ لْحَاجَة

وَكْلاَمْ مَنْ فُمْ رْهِيفْ

يْنَغَّمْ لَذْهَانْ

مَشْطَة دْ لَعْظَمْ

تَسَلَّكْ سْوَالَفْ لَغْصَانْ

تْكَرَّدْ  لَمْشَعْكَكْ 

تْدِيرْ لُو طُرْقَانْ   

حَكَّاكَة حْجَرْ بِيهَا

تَرْطَابْ لْﮕسْدَة 

تْسَرَّحْ لَعْظِيمَاتْ السْخَانْ

شْوِيَّة سْوَاكْ مْحَرْقَصْ

وَعْكَرْ فَاسِي 

يْرَطَّبْ شْفَايَفْ لْغُزْلاَنْ

شْوِيَّة غَسُولْ بَلْدِي

وَتَشْگِيگَة بْشَلاَّ عْطُورْ:

قْرُنْفَلْ حَنَّة وْرِيحَانْ

وْحَرْمَلْ وَرْزَازْ 

وَبْخُورْ مَنَّة مَنْ لْحَنَّانْ

جَاوِي وْشَبَّة 

وَحْصَلَبانْ 

مْكِيحْلَةْ مْرَاوَدْ

وَقْشُورْ رُمَّانْ

وْلاَتُوخْ بْرِيحَة فَايْحَة

وَقَطْرَانْ

والزَّوَاقْ آشْ يْدِيرْ 

لَلْهَيْبُوش وَالصَّيبَانْ

وَيَاسْمِينَة تْرَطّبْ يَدِّينْ

مَا يَبْقَى مْشَگْ يْبَانْ

وَصَابُونْ بَلْد

لْحَمَّامْ لاَلَّة 

تَقْهَرْ بِيهْ الزْمَانْ         

إدريس بندار                                         

                                                                         °°°°°°°°°°°°