قنوط الصمت /بقلم نبيل عبد الحليم
(قنوط الصمت)
هو ليه الغرام عشق السكوت
وشوقي ليك كل يوم عمال بيموت
عش الغرام
تم خراب
والعنكبوت نسج الخيوط
كل مانسج خيط فى ودك
ألاقيها إتقطعت
كل الخيوط
أملي فى نقطة نهايه
توصلها كل الخطوط
أحلم بقصر أسكنك
بدل البيوت
وأنت تلم فى الحطام تعمل تابوت
انا ذنبي أيه
حنيني فاض
وأنت لابس لجام سكوت
مين إللي قال إن الرضا
بقا فى السكوت
أصل السكات فى الغرام
اصبح قنوط
وبحرف واحد
فرق شاسع
بين القنوت والقنوط
نفسي تحكي
نفسي اسمع
نفسي أشوف
عشقي ليك أصل كان
من غير شروط
لما أسمك ينذكر
قلبي ينصاب بالهبوط
من غير وجودك
كياني أيل للسقوط
لحن صوتك مش كلام يضمد جروح
له عطر تاني بيه يفوح
يلململي بيه وقتها
شتات الروح
قولي ليه الغرام عشق السكوت
بقلمي نبيل عبد الحليم
21/11/2020
تعليقات
إرسال تعليق